Аймгийн Цагдаагийн газар орчин үеийн стандартын шаардлагад нийцсэн байртай боллоо

Энэ үеэр ЦЕГ-ын тэргүүн дэд дарга, цагдаагийн хурандаа Р.Отгонжаргал хэлсэн үгэндээ "Цагдаагийн байгууллагын алба хаагчдын ажиллах нөхцөл боломжийг сайжруулж, орчин үеийн стандартын шаардлагад нийцсэн ажлын байрыг барьж ашиглалтад оруулахад бүхий л талын дэмжлэг туслалцаа үзүүлсэн ХЗДХЯ, Сангийн яам, Дундговь аймгийн ИТХ, ЗДТГ, "Ванхүү”  ХХК-ийн хамт олонд цагдаагийн газрын нэрийн өмнөөс болон хувиасаа чин сэтгэлийн талархал илэрхийлж байна гээд цаашид Цагдаа, Дотоодын цэргийн байгууллагад дэвшүүлсэн зорилт болон иргэдийнхээ амар амгалан, аюулгүй байдлын төлөө хуулиар хүлээсэн чиг үүргээ нэр төртэй биелүүлж, албаныхаа үүргийг өндөрт өргөхийн төлөө чармайн ажиллана” гэлээ.

Тэрээр ХЗДХЯ-наас Дундговь аймгийн Цагдаагийн газарт хандивласан иж бүрэн компьютер, ЦЕГ-аас өгсөн 54,8 сая төгрөгийн үнэтэй "Хьюндай элентра” маркийн автомашины батламжийг гардууллаа.

Мөн энэ үеэр аймгийн ИТХ-аас нэг сая төгрөг, ЗДТГ-аас дурсгалын зүйл гардуулж, УИХ-ын гишүүн Д.Дамба-Очир, Сангийн яамны төрийн нарийн бичгийн дарга С.Наранцогт, Засаг даргын орлогч Ж.Мөнхчулуун, аймгийн Цагдаагийн газрын дарга, хурандаа О.Амарсанаа болон ахмадын төлөөлөл үг хэлж, баяр хүргэлээ.

Мөн энэ үеэр ажил албандаа амжилт гаргасан, хүн ардынхаа сайн сайхан, амар тайван амьдралын төлөө хичээнгүйлэн ажилласан зарим алба хаагчийг Сангийн яамны болон аймгийн шагналаар шагнасан юм.

Барилгын ажлыг 2019 оны улсын төсвийн 2,1 тэрбум төгрөгийн хөрөнгө оруулалтаар "Ванхүү” ХХК барьж, орчин үеийн стандартын шаардлагад нийцсэн, дөрвөн давхар, 59 өрөө тасалгаатай, хурлын болон бялдаржуулах танхим, цайны газартай 1600 квм барилгыг ийнхүү ашиглалтад хүлээлгэн өгч байгаа ажээ.

 

Д.Алтантогос