ХӨГЖМИЙН ЗОХИОЛЧ Г.ЭРДЭНЭЧУЛУУНЫ НЭРЭМЖИТ ДУНДГОВИЙН СЭДЭВТ ДУУНЫ УРАЛДААН

Соёлын тэргүүний ажилтан, Хөгжмийн зохиолч Гомбын Эрдэнэчулууны нэрэмжит,  Дундговь аймгийн сэдэвт дууны  "Говь сайхан нутаг” уралдааны дүнг Мандалговьд гаргалаа.  Уралдаанд ирсэн дууны хөгжмийн зохиолч, яруу найрагч, дуучид оролцсон нэгдсэн тоглолтыг Монгол улсын урлагийн гавьяат зүтгэлтэн, хөгжим судлаач  Ч.Буянхишиг, Урлагийн гавьяат зүтгэлтэн Д.Доржсүрэн, Соёлын гавьяат зүтгэлтэн, яруу найрагч Дан.Нямаа, Соёлын тэргүүний ажилтан, хөгжмийн зохиолч  Г.Эрдэнэчулуун нар  шүүн шалгаруулсан юм. Дүн гарахад  Монгол улсын Урлагийн гавьяат зүтгэлтэн Т.Сэр-Одын хөгжим,  Э.Гантулгын шүлэг "Шуранхайн тарнитай нутаг” дуу тэргүүн байранд шалгарч  Монгол улсын урлагийн гавьяат зүтгэлтэн Д.Баттөмөрийн хөгжим, яруу найрагч О.Гончигсүрэнгийн шүлэг, Ц.Туяацэцэг, Л.Нарангэрэл, Хандмаа нарын дуулсан "Өөш манханы говь” дуу дэд, Хөгжмийн зохиолч Х.Мөнх-Ертөнцийн хөгжим, Цэцэнбилигийн шүлэг "Дундговь өвөөгийн минь нутаг” дуу гутгаар байрт шалгарлаа. Мөн Батсүхийн хөгжим, Д.Нацагдоржийн шагналт яруу найрагч А.Лхагваагийн шүлэг, Уранчимэгийн дуулсан "Ерөөл учралын нутаг” Сайнтөмөрийн хөгжим, Д.Нацагдоржийн шагналт яруу найрагч Д.Нямлхагвын шүлэг , Туваансүрэнгийн дуулсан "Өөжин шаргал нутаг”  дуу тэсгай байранд шалгарсан бол Соёлын тэргүүний ажилтан, хөгжмийн зохиолч Г.Эрдэнэчулууны нэрэмжит шагналыг  Хөгжмийн зохиолч Б.Эрдэнэбаярын хөгжим, П.Бямбалхагвын шүлэг "Амилж ургасан нутаг” Хөгжмийн зохиолч Ш.Өлзийбаярын хөгжим, Даваасүрэнгийн шүлэг "Далай өөжин дуу хүртсэн юм.  Энэхүү уралдаанд 40 гаруй бүтээл ирснээс цаашид олны хүртээл болж   урт наслах бүтээл олон байгаагаас гадна зарим дуу болзолд заасан сэдэвт хамааралгүй, аялгуу, шүлэг хоёрын зохицол тохирохгүй зэрэг учир дутагдалтай байгааг шүүгчдийн бүрэлдүүн онцлон хэлж байлаа. Уралдааныг аймгийн Засаг даргын тамгын газар, Боловсрол, соёл, урлагийн газар, ТХДЖТ, Найрал дууны анги,  Ц.Отгонбаяр захиралтай "Дэлгэрэх бүрд” ХХК, О.Эрдэнэбаяр захиралтай "Рояал” төвийн хамт олон ивээн тэтгэж дэмжин оролцлоо.