ДУНДГОВИЙН АХМАДЫН ШИНЭ ЖИЛИЙН БАЯР ЮМ ЮМТАЙ...

Дундговь аймгийн Ахмадын хороо шинэ жилээ ёслон тэмдэглэлээ. 15 сумын Ахмадын хорооны дарга нар, сум сумын ахмадын оролцоог хангаснаараа энэ шинэ жилийн баяр онцлог юм. Өвлийн өвгөнтэй, хоёр алиалагчтай, цасан охидтой, 12 жилийн тоглолт, урлагийн номеруудтай. Тэр бүхнийг сумдын ахмадууд бэлдэж иржээ. Ажиглахад Өндөршил, Дэлгэрхангай, Говь-Угтаалын ахмадууд тун чамбай бэлтгэлтэй харагдсан. "Эрүүл хүнс эрүүл амьдрал, урт наслахын үндэс” уриан дор ахмадууд амтат хоолны үзэсгэлэн өмнө нь гаргаж дүгнэсэн байна. 12 жил оролцсон багт наадамд гэхэд сум бүр нэг нэг "Амьтан” бэлдэж ирсэн бол Өндөршилийн Ахмадын хороо хөгжимчин нь хөгжим, аппаратуртайгаа, Дэлгэрхангайнх Өвлийн өвгөнтэйгөө, Баянжаргалан сум цасан охинтойгоо... гэхчилэн хүрч ирж сум бүр цэнгээнт бүжгийн тэмцээний хосуудаа авчирсан гээд бод доо. Манай ахмадууд хачин идэвхитэй байгаа биз.
            За тэгээд дуу хуур, багт наадам, дүрийн тоглолт, шагнал урамшил, өвлийн өвгөний бэлэг, цасан охидын бүжиг, азын сугалаа...Алиалагчид алдаа оноо хардаг дурантайгаа... гээд юм юмтай , өргөн шинэ жил. Цэнгээнт бүжигт гэхэд сум сумаас ирсэн 20 хос өрсөлдөж Дэлгэрхангайн  Эрдэнэсүрэн, Сугир, Сайнцагааны Ц.Жинлин, Цэгмид,  Говь-Угтаалын Б.Цогтбаатар, Ш.Мөнхцэцэг нарын хос эхний гурван байранд шалгарсан юм. Ахмадын шинэ жилийн баярт аймгийн ИТХ-ын тэргүүлэгчдийн нарийн бичгийн дарга Ц.Мөнгөнцоож, ЗДТГ-ын хэлтсийн дарга А.Нарантуяа, ХХҮХ-ийн дарга Г.Хишигдаваа нарын албаны хүмүүс урилгаар оролцлоо.