"Хүмүүн бичиг" булан байгуулжээ

Дундговь аймгийн Эрдмийн далай цогцолбор сургуулийн багш Э.Баттогтох сургууль дээрээ багш, ажилтан, сурагчдад үндэсний бичгээ сурах орчин бүрдүүлэх зорилгоор "Хүмүүн бичиг" булан байгуулжээ.

Түүний өвөө Санжидын Нямдорж монгол бичиг заан сургах, түгээн дэлгэрүүлэх үйлст хөдөлмөр, зүтгэлээ зориулсан эрхэм хүмүүн байжээ. Өвөөгийнхөө өвлүүлэн үлдээсэн соёлын үнэт өв ховор номууд, таталган гар бичмэл болон хүмүүн бичиг сонины анхны дугааруудаас эхлээд он, оны сонин зэргийг тус буланд байршуулсан байна.

Багш Э.Баттогтох өвөөгийнхөө тухай дурсахдаа: Миний өвөө Санжидын Нямдорж нь өв соёлоо түгээн дэлгэрүүлэх үйлст томоохон хувь нэмэр оруулсан монгол бичгийн багш, угийн бичиг судлаач сэхээтэн хүн байсан.

Энэ үзэл үйл хэрэг нь надад нөлөөлсөн байх. Өвөөгийн минь талаар олон сайхан дурсамж бий. Монгол бичгээр бүх зүйлээ татлан бичдэг, тамхиа баагиулан "Хүмүүн бичиг” сониноо уншаад, гол мэдээллийнх нь доогуур зурж тэмдэглэн уншиж дуусаад дугаар дугаараар нь үдээд, ач зээ нараараа уншуулдаг байлаа.

Өвөө маань надад анхлан монгол бичгийг үеэр холбон заан таниулж, сурах боломжийг олгосон болохоор би их азтай хүн. Уншдаг болоод ирэхээр өөрөө татлан бичээд, түүнийгээ уншуулж шалгалт авдаг, мөн "Хүмүүн бичиг” сонины монгол бичгийн буланд нийтлэгддэг хичээлийг хийлгэдэг байлаа.

Өвөөгөөр маань аймгийн монгол хэл бичгийн олимпиадын таталган унших даалгаврыг бэлтгэн хийлгэдэг байсан. Мөн үзүүлэн, тараах материалаа өөрөө нямбай гэгч нь зурж бэлтгэн цүнхэндээ хийж аваад л 15 сумаар явж сургалт хийдэг, бас угийн бичиг хөтлөх сургалтыг аймаг, сумдад зохион байгуулж, ураг удмынхаа угийн бичгийг хөтлөн бидэндээ өвлүүлж үлдээсэн байдаг юм.

Миний өвөө ийм мундаг хүн байсан, миний бахархал юм. Ийм л өв соёлоо дээдлэх бахархах,түгээн дэлгэрүүлэх орчинд өссөн болохоор би их азтай хүн. Цаашдаа энэ булангаа улам төрөлжүүлэн баяжуулж ажиллах болно” гэлээ.