Ж.ДҮНЖМААГИЙН НЭРЭМЖИТ УРТЫН ДУУ ДУУЛААЧДЫН УЛСЫН УРАЛДААН ӨНДӨРЛӨВ

Монгол улсын гавьяат жүжигчинЖ.Дүнжмаагийн нэрэмжит Уртын дуу дуулаачдын "Энх мэндийн баяр"
улсын уралдаан Дундговь аймгийн төв Мандалговьд хоёр өдөр үргэлжлэн өндөрлөлөө.  Дундговь аймгийн  Төв халхын дуулалт жүжгийн театрыг Соёлын ордон байсан далаад оноос гавьяаны амралтдаа гартал ажилласан Гавьяат маань одоо  "Тэнгэрийн тэмдэг” хүүхдийн театрын  Уртын дууны багшаар ажиллаж байгаа юм. Түүний нэрэмжит уламжлалт энэ уралдааны Ерөнхий зохион байгуулагчаар "Тэнгэрийн тэмдэг” хүүхдийн театр, хамтран зохион байгуулагчаар Дундговь аймгийн Засаг даргын тамгын газар, Боловсрол, соёл, урлагийн газар, Төв Халхын дуулалт жүжгийн театр  ажилласан бол О.Ганбат захиралтай "Ган-Илч” компани, С.Од-Эрдэнэ захиралтай "Тотал мюзик- компани, Д.Оюунчимэг захиралтай "Ялгуум билэгт” компани  ивээн тэтгэгчээроролцлоо. Дундговь аймгийн Засаг даргын үйл ажиллагааны хөтөлбөрт "Дуу хуурын нутаг"-ийн биет бус өвийг түгээн дэлгэрүүлэх, залуу үед өвлүүлэх талаар тусгасан заалтыг хэрэгжүүлэх хүрээнд ирэх намар зохион байгуулах "Уяхан замбуу тивийн наран"  ардын урлагийн наадам угтсан урлаг соёлын  нэг томоохон ажил нь энэхүү улсын уралдаан юм.
Уралдааны шүүгчээр Монгол улсын гавьяат жүжигчин Ж.Дүнжмаагийн хоёр дүү хоёулаа Монгол улсын Ардын жүжигчин А.Дашпилжээ, А.Нэргүй, мөн шавь Монгол улсын гавьяат жүжигчин С.Цогтсайхан нар ажиллав. Монгол улсын гавьяат жүжигчин Ж.Дүнжмаагийн шавь Монгол улсын гавьяат жүжигчин С.Цогтсайхан саяхан Саудын Арабт болсон олон улсын уралдаанаас хүртсэн Гран-при шагналынхаа дээжийг багшдаа хүндэтгэлтэй гардуулсан болон  Ж.Дүнжмаатай хамт ажилладаг Монгол улсын гавьяат жүжигчин, туульч, ерөөлч Х.Цэрэнчимэд  Монгол ардын дууг исгэрэн мялаалга өргөсөн нь энэ наадмын сэтгэл хөдөлгөж олон хүнийг огшоосон  сюрприз байв.
             Энэ уралдаан нь  авьяаслаг хүүхдүүдийг 5-9 дүгээр анги, 10-12 дугаар анги эрэгтэй, эмэгтэй гэсэн ангиллаар, насанд хүрэгчид Ардын авьяастнуудыг Уртын дуу дуулаач, морин хуурч гэсэн ангиллаар шалгарууллаа.
Дүн гарахад хүүхдүүдээс Дорноговь аймгийг бяцхан авьяастан Цэлмэг, насанд хүрэгчдээс Адаацаг сумын ардын авьяастан С.Насанбат нар энэ уралдааны Гран-при шагналын эзэд болж цом, мөнгөн шагнал хүртлээ. 5-9 насны эмэгтэй хүүхдүүдээс тэргүүн байрыг Баянхонгор аймгийн Өлзийт сумын Одонтуяа эзэлж 2,3 дугаар байрыг Говьсүмбэр аймгийн Энхмаа, Дундговийн "Говийн ирээдүй” цогцолбор сургуулийн Цэрэнханд, тусгай байрыг Улаанбаатар хотын Анужин,  эрэгтэй номинацид Өндөршил сумын Дэлгэрсайхан тэргүүлж мөн сумын Бат-Ирээдүй, Өлзийт сумын Мандахбаяр 2,3 дугаар байр, Өлзийт сумын Мөнх-Өлзий, Өмнөговь аймгийн Ханхонгор сумын Буяндэлгэр нар тусгай байрын шагнал хүртлээ.
            10-12 ангийн охидоос "Хүмүүнлэг” сургуулийн Үржинханд тэргүүлж 2,3 дугаар байрыг Өлзийт сумын Чулуунцэцэг, Өмнөговь аймгийн Ханхонгор сумын Баярцэцэг нэр эзлэн "Мандал сургуулийн Долгормаа, Өлзийт сумын Үүрийнтуяа нарт тусгай байрын шагнал олголоо. Энэ ангиллын хөвгүүдээс   1,2 дугаар байранд шалгарах авьяастан гарсангүй, гутгаар байранд  Лаборатори "Эрдмийн далай” цогцолбор сургуулийн Т.Гомбожав шалгарч тусгай байрын шагналыг  мөн сургуулийн Гонгор,  Хаянхярваа нар хүртлээ.
             Насанд хүрэгчдээс тэргүүн байранд Эрдэнэдалай сумын Т.Өлзийбат, дэд байранд Баянхонгорын Тамир, гутгаар байранд Өвөрхангайн М.Дүгэрсүрэн, тусгай байранд Улаанбаатарын Тосмаа нар шалгарсан юм. Мөн Уртын дуучдын холбооны шагналаар А.Дашжид\ Ж.Дүнжмаа, А.Дашпилжээ, А.Нэргүй нарын төрсөн дүү\, Улаанбаатарын Нандин-Эрдэнэ, Дундговийн Морин хуурч сурагч Бум-Эрдэнэ, Монгол улсын гавьяат жүжигчин Ж.Дүнжмаагийн нэрэмжит шагналаар Адаацаг сумын Т.Эрдэнэбаяр, Ю.Дагдан нар шагнагдав. Морин хуурчдаас  Улаанбаатарын Алтанбат тэргүүлж Дэрэн сумын Арилд, Өлзийт сумын Ууганбаяр нар 2,3 дугаар байранд шалгарлаа.
Уралдаанд оролцогчдын хамгийн ахмад настан Өлзийт сумын Шар гуай Монголын Ахмадын холбооны Хүндэт тэмдгээр шагнагдсан юм.
            Монгол улсын гавьяат жүжигчин Ж.Дүнжмаагийн уртын дууны  6000 шахам шавь нараас энэ уралдааны шагнал хүртэгчид олон байгааг энд үг хэлсэн хүмүүс онцолж  Соёлын биет бус нандин өв тээгчийнхээ хувьд энэ ховор өв соёлыг залуу үедээ өвлүүлэх дэг сургуулийг бий болгосныхоо хувьд  Ж.Дүнжмаад дараагийн өндөр дээд алдар цол ойрхон байгааг тэмдэглэж байлаа. Хэдэн жилийн өмнө Монгол улсын гавьяат жүжигчин Ж.Дүнжмаа, А.Нэргүй, А.Дашпилжээ нар анх "Өлгий нэгтэй гурван гавьяат” гэсэн тоглолтыг хийж байсан бол хоёр дүү нь Монгол улсын Ардын жүжигчин цолтон болоод байгаа болохоор "Өлгий нэгтэй гурван Ардын жүжигчин” тоглолтоо удахгүй хийхийг Ж.Дүнжмаад хүндэтгэл үзүүлж шагнал гардуулсан олон хүн бэлгэдэн ерөөжбайлаа. С.ПҮРЭВСҮРЭН