УРТЫН ДУУЧДЫН УЛСЫН УРАЛДААН МАНДАЛГОВЬД ЭХЭЛЛЭЭ

Монгол улсын гавьяат жүжигчин Жамъянгийн Дүнжмаагийн нэрэмжит "Энх мэндийн баяр” уртын дуу дуулаачдын улсын уралдаан өнөөдөр Дундговь аймгийн төв Мандалговьд эхэллээ.  
Энэ уралдаан нь ардын авьяастан, хүүхэд гэсэн хоёр төрөлдөө хоёр үе шаттай болно. Хүүхдийн  төрөл нь эрэгтэй, эмэгтэй гэсэн хоёр ангилалтай  байх ба оролцогчид хоёр ангилалдаа өөрийн урын сангаас дуулах юм.  Эхний шатны шалгаруулалтад оролцогчид өөрийн сонголтоор болон урын сангаас, дараагийн шатанд зохион байгуулагчдын зүгээс заасан дуунаас дуулна.
Энэ уралдааны ерөнхий зохион байгуулагчаар Дундговь аймгийн  Алдарт уртын дуучин Жигзавын Дорждагвын нэрэмжит  "Тэнгэрийн тэмдэг”, хамтран зохион байгуулагчаар Дундговвь аймгийн Засаг даргын тамгын газар, Сайнцагаан, Өлзийт сумын ЗДТГ, Төв халхын дуулалт жүжгийн театр ажиллаж байна. Энэхүү уралдаанд Төв, Дундговь, Дорноговь, Өмнөговь, Сэлэнгэ, Дархан-Уул аймаг, Улаанбаатар хотын зарим дүүрэг  зэрэг олон аймаг, хотоос уртын дуучид оролцож, шүүгчээр Монгол улсын Ардын жүжигчин А.Дашпилжээ, А.Нэргүй,  Монгол улсын гавьяат жүжигчин С.Цогтсайхан нар ажиллаж байна.
Уртын дуу дуулаачдын улсын уралдааны нээлтэд Дундговь аймгийн Засаг дарга О.Бат-Эрдэнэ оролцон  үг хэллээ. Тэр хэлсэн үгэндээ "Ирэх наймдугаар сард Их газрын чулууны байгалийн задгай театрт болох Ардын урлагийн "Уяхан замбуу тивийн наран” их наадам, 3000 морин хуурч, уртын дуучдын "Мөнх тэнгэртээ өргөх дуун цацал” нэгдсэн тоглолтыг угтсан урлаг соёлын хөтөлбөрийн нэг хэсэг нь энэ Уртын дуу дуулаачдын улсын уралдаан юм” гэж онцоллоо. Нээлтэд "Тэнгэрийн тэмдэг” хүүхдийн театрын авьяаслаг хүүхдүүд урлагийн тоглолтоо сонирхууллаа.
Ч.ХОНГОРЗУЛ