БИЧЭЭЧИЙН БАТМӨНХ: ХӨНЖИЛ, ДЭЛИЙН УУЛАНД БОЛСОН МӨСНИЙ БАЯР ШУУГИАН ТАРЬЛАА.

ДЭЛ ХӨНЖИЛИЙН ДАЛАЙН ХИЙДИЙН МӨСНИЙ БАЯР ХӨВСГӨЛИЙН ДАЛАЙ ЭЭЖИЙН МӨСНИЙ БАЯРААС ИЛҮҮ ШУУГИАН ДЭГДЭЭВ.
"Дэл Хөнжилд мөсний баяр болов", "Зуун хүн цуглав", "Зургаан тэмцээн зохиов", "Хуур эгшиглэнгүүт тэнгэрээс их цагаан манан буув", "Тэмцээн эхлэнгүүт тэнгэр цэлмэв", "Баяр сайхан болов", "Баяртай гээд тарцгаав"... Ийм гэгээлэг мэдээ Хөвсгөл далайн цэнхэр мандлаас биш, Хөнжил, Дэлийн уулнаас  дэлхий дахинаа цацагдлаа.
*****
...Хоорондоо ойрхон оршдог Дэл уулын Баруун билүүний хийд, Хөнжил уулын Далайн хийд хоёр зуугаадхан жилийн өмнө лам хуврагууд бужигнасан говийн томоохон хийдүүд байв. Цагийн эрхээр одоо туурь үлджээ.
Хөнжил уулын Далайн хийдийн дэргэдэх булаг энэ өвөл мөсөн далай болон оргилон хөлдсөнийг Өлзийт нутгийн малчин Б.Нармандах /Мандаа/ Бямбацогт нар санаачилга гарган нутгийн зон олонтойгоо мөсний баяр хийлээ, хэдхэн хоногийн өмнө. Олон хүн цуглав.
Цагаан сар хуучраагүй хаврын дулаахан сайхан энэ өдөр олон хүн цуглаж дуур хуур эгшиглэнгүүт манан бууж төдөлгүй тэнгэр цэлмэж нар ээж орой болтол тэнгэр хачин сайхан байжээ.
Ахмад буурлуудаа идээ будаатай нь хоймортоо залж дайлж цайлан, ерөөлийн сайхан үгээр баяраа эхлүүлэв.
Ц.Хадхүү даргатай Өлзийт сумын Соёлын төвийнхөн нутгийн хүн зон, уул хайрхан, лус савдгаа морин хуурын эгшиг, ая дууны түрлэгээр баярлуулав.
Дундговь, Өмнөговийн малчид голдуу 100 гаруй хүн цуглаж хоккей, олс таталт зэрэг нилээд хэдэн тэмцээн зохион байгуулан бүтэн өдөржин наадан цэнгэсэн байна. Тэнд болсон олны сонирхол татсан хамгийн сонирхолтой үзүүлбэр нь Дэл, Хөнжилд өөр нутгаас ирсэн нас насны 7 эмэгтэй "Долоон бэрийн цай" байв.
Баяр сайхан болж өндөрлөв.
Хойтон жил Далайн амны энэ мөсөн дээрээ шүү, даагаа нэхнээ, дараа олуулаа ирнээ, Мандаа ахдаа баярлалаа, Бямбацогт чи шүү, баяртай Чойдог ахаа, Андал ах аатай байлаа шүү, Цэнд эгч хөөрхөн шүү, Донгоо аниадаа баярлалаа... гэлцсээр нутаг нутгийн зүг хөлгийн жолоо залцгаалаа, манай Дэл, Хөнжилийнхөн.
Дэл, Хөнжил минь дэндүү сайхан нутаг, Дэл, Хөнжилийнхөн ч дэндүү сайхан хүмүүс.
Баярлалаа нутаг, нутгийнхандаа.
Дэл уулын Бичээчийн БАТМӨНХ
2019 он