“Дундговь нэрийн бэлгийн багц”-д орох бүтээгдэхүүнийг шалгаруулав

Аймгийн ЗДТГ, ХХҮГ, ХХААГ хамтран орон нутагт үйлдвэрлэсэн бүтээгдэхүүнээс "Дундговь нэрийн бэлгийн багц” шалгаруулах зорилгоор үзэсгэлэн худалдаа зохион байгууллаа.

Нутгийн нэрийн бэлгийн багцтай болох нь орон нутгийн үйлдвэрлэгчдийг дэмжин тэдний бүтээгдэхүүнийг төр худалдан авах, цаашид брэндийг хөгжүүлэх зорилготой юм.

Ийм зорилгоор тус аймаг брэнд бүтээгдэхүүний таних тэмдэг(лого)шалгаруулах уралдаан зарласан. Харин бэлгийн багцад орох бүтээгдэхүүнийг сонгохын тулд дээрх үзэсгэлэн худалдааг зохион байгуулсан байна.

Үзэсгэлэнд 4 сумын 20 бизнес эрхлэгч эсгий урлал, нэхмэл бүтээгдэхүүн, бэлэг дурсгалын зориулалт бүхий сийлбэр, хөхүүр гэх мэт бүтээгдэхүүээ дэлгэн сурталчилж, 1.5 сая төгрөгийн борлуулалт хийжээ.

Энэ үеэр зохион байгуулагчдын зүгээс 7-8 бүтээгдэхүүнийг бэлгийн багцад оруулахаар сонгон авсан байна. Харин брэнд бүтээгдэхүүний лого шалгаруулах уралдаанд 3 бүтээл ирсэн бөгөөд оролцогчдын тоог нэмэгдүүлж, өрсөлдөөнийг дэмжих зорилгоор тус уралдааны хугацааг 2022 оны 1 дүгээр сар хүртэл сунгасан аж.