ДУНДГОВИЙН УУГУУЛ ДОКТОР ЕРӨНХИЙЛӨГЧИЙН НЭРЭМЖИТ "ШИЛДЭГ ЗАЛУУ ЭРДЭМТЭН" ШАГНАЛ ХҮРТЛЭЭ

Дундговь аймгийн Говь-Угтаал сумын уугуул, доктор Батсүхийн Цэрэндулам  Монгол улсын Ерөнхийлөгчийн шагнал хүртлээ. Түүний өндөр өвөө Батнасан Говь-Угтаал сумын даргаар ажиллаж байсан бол өвөө Батнасангийн Шатарын охин, кино жүжигчин, найруулагч Ш.Цэцгээ Монгол улсын гавьяат жүжигчин юм. Тэгвэл энэ ураг удмынхнаас төрсөн нэгэн залуу доктор Монгол улсын Ерөнхийлөгчийн нэрэмжит "Шилдэг залуу эрдэмтэн” шагналын эзэн төрлөө.
Шилдэг залуу эрдэм шинжилгээний ажилтан, судлаачдад олгодог "Шилдэг залуу эрдэм шинжилгээний ажилтан, судлаачдад шагнал олгох тухай” зарлигт:
"Хүний биеийн олон эд эрхтний гажиг үүсэхэд оролцдог шинэ генүүдийг илрүүлэн баталж, энэ төрлийн хам шинжийн үүсэх молекул механизм, учир шалтгааныг тайлбарлах; удамшлын шалтгаант гажиг үүсгэдэг синдромуудын ген, мутаци, молекул механизм, нийлэгждэг уураг, тэдгээрийн харилцан үйлчлэлийг судалж, өвчин үүсэх механизм, түүний явцыг танин мэдэх, улмаар оношлох, эмчлэхэд ач холбогдол бүхий "Хүний генетикийн гажиг үүсгэгч зарим генүүдийн харилцан үйлчлэл” сэдэвт судалгааны бүтээл туурвисан Шинжлэх ухааны Академийн Ерөнхий болон сорилын биологийн хүрээлэнгийн Генетикийн лабораторийн эрхлэгч, доктор Б.Цэрэндулам” гэжээ.