ДУНДГОВИЙН ЗОХИОЛЧДЫН ӨГҮҮЛЛЭГҮҮД ГУРВАН ХЭЛ ДЭЭР ӨМНӨД ХӨРШИД ХЭВЛЭГДЛЭЭ

Өнгөрөгч жил БНХАУ-ын ӨМӨЗО-ны Шилийнгол аймгийн болон Монгол улсын говийн бүсийн аймгуудын зохиолчдын богино өгүүллэгийн уралдаан Мандалговьд болсон билээ.  Уран бүтээлийн энэ нөхөрсөг уулзалтыг ӨМӨЗО-ны Шилийн гол аймгийн Түмэнгэрэл тэргүүтэй "Тулга" хайр, халамжийн нийгэмлэг, Д.Наранцогтын тэргүүлдэг "Байгаль, эх дэлхийгээ аврах тэнгэрлэг аян"-аас санаачлан зохион байгуулсан. Энэ уралдаанд шалгарсан шилдэг 20 өгүүллэгийг дээрх холбоо, нийгэмлэгээс эрхлэн хятад, монгол хэл дээр болон уйгаржин монгол үсгээр хадмалдан "Хүй дэлхий" нэрээр өмнөд хөршид олон мянган хувь хэвлүүлсэн байна. "Хүй дэлхий" номд Дундговь аймгаас зохиолч Ц.Ганхуяг, Л.Бархас, Х.Энхтуяа, Б.Уугантуяа нарын өгүүллэг шалгаран хэвлэгджээ. Энэхүү номын нээлт  хараахан болоогүй ч дээжийг  дээрх нийгэмлэгийн тэргүүн С.Түмэнгэрэл, зохиолч, яруу найрагч Сэцэнгуа нар аймгийн Утга зохиолын нэгдлийн тэргүүн Ж.Мөнхтөр, зохиолч Л.Бархас, Ц.Ганхуяг нарт Мандалговьд  гардууллаа.