Ирэх сараас гадаад паспортыг 10 жилээр олгоно

Ирэх арваннэгдүгээр сарын 1-нээс Иргэний бүртгэлийн тухай шинэчилсэн хууль хэрэгжиж эхэлсэнээр гадаад паспортыг 10 жилийн хугацаатай авах боломж бүрдэх юм байна.

Тодруулбал, 2004 онд Каир хотноо болсон Олон улсын иргэний нисэхийн байгууллагын 12 дугаар уулзалтаас "Машинаар унших паспортын хүчинтэй хугацааг сунгахгүй байх, дардас, резинэн тамгаар сунгасан паспортыг машинаар уншигдах баримт бичиг гэж хүлээн зөвшөөрөх үндэслэлгүй болох тухай” шийдвэр гаргасантай холбогдуулан, Монгол Улсын иргэд энгийн гадаад паспортынхаа хугацааг сунгуулж гадаадад зорчих нөхцөлд үүнийг нь дэлхийн олон орон үл хүлээн зөвшөөрөх, олон улсын нислэгээр зорчуулахгүй байх, хилээр нэвтрүүлэхгүй эрсдэл үүсч байгаа юм. Иймд олон улсын стандартад нийцүүлэх зорилгоор Монгол Улсын энгийн гадаад паспортыг чипгүй бол таван жилийн, харин чиптэй энгийн паспортыг 10 жилийн хугацаатай олгож, дахин сунгалт хийхгүй байхаар тогтсон билээ.

Дашрамд сонирхуулахад, гадаад паспортыг 10 жилийн хугацаатай авахтай холбоотойгоор иргэдээс авдаг төлбөр хураамжид ямар нэгэн өөрчлөлт орохгүй юм байна.