Жоншны баяжуулах үйлдвэр ашиглалтад ороход бэлэн болжээ

Сумын төвөөс зүүн тийш 2,8 км-т байрлах жоншны "Зүүн-Аргатай” ордыг түшиглэн байгуулах жонш баяжуулах энэхүү үйлдвэр жилд 100.0 мян.тн хүдэр боловсруулах хүчин чадалтай, хагас автоматчилагдсан тоног төхөөрөмжтэй, технологийн процессийн хяналтын систем, шинжилгээний лабораторитой үйлдвэр ажээ.

Хайлуур жоншны хүдрийг олборлож байгаа нутагт хувийн аж ахуйн нэгж, хувиараа жонш олборлогчид үйл ажиллагаа явуулж, тэдний хувьд олборлолтыг хийхдээ ухагч механизм ашиглан хайлуур жоншийг сорчлон авч, агуулга багатай хэсгийг орхин түүхийгээр нь экспортлох явдал элбэг байдаг ажээ.

Мөн хөрс хуулалтыг дутуу хийж, ашигт малтмалын хаягдал, бохирдол ихэсч, хяналтгүйгээр ордыг ихээхэн сэглэн сүйтгэж, илрэл бүхий газруудыг гараар ухаж өнгөөр ялган шууд машинд ачаалдаг байна.

Тиймээс энэ баялгийг түүхийгээр хямд экспортлох биш чанарыг нь сайжруулан нэмүү өртөг шингэсэн бүтээгдэхүүн үйлдвэрлэн экспортлох нь энэхүү үйлдвэрийн зорилго юм. 

Жоншны "Зүүн-Аргатай” ордод түшиглэн байгуулсан "Болоржонш” ХХК-ийн жонш баяжуулах үйлдвэр нь түүхий эдээ Баянжаргалан сумын хайлуур жоншны бусад ордоос ч хангах бөгөөд одоогоор 55 ажлын байр шинээр бий болох аж.

Тус аймгийн хэмжээнд жоншны ашиглалтын 17 тусгай зөвшөөрөл байдаг бөгөөд 1362 га талбайг хамардаг. Тиймээс "Болоржонш” жонш боловсруулах үйлдвэр нь эдгээр ордоос түүхий эдээ авах боломж бүрдэж байгаа бөгөөд ажлын байр, татварын орлогыг нэмэгдүүлж, аймаг, сумынхаа эдийн засгийн хөгжилд хувь нэмрээ оруулах ач холбогдолтойг сумын Засаг дарга Т.Цэвэлмаа онцоллоо.  Ажилчдын хоол, хүнс, ажлын хувцас гээд дагалдах үйлдвэрлэл, үйлчилгээ ч хөгжих боломжтой юм.

Д.Алтантогос