МОНГОЛЫН РАДИОГИЙН ЗАХИРАЛ Г.БАТЗАЯА "АЛТАН ТӨЛИЙН ЭЗЭН"-Д ШАГНАЛЫГ ГАРДУУЛЛАА

ХХААХҮ-ийн яам, МҮОНРТ-ээс 41 дэх жилдээ уламжлал болгон шалгаруулж байгаа Монголын радиогийн "Таван эрдэнэ” нэвтрүүлгийн нэрэмжит "Алтан төлийн эзэд”-д шагналыг гардуулах ажил орон нутагт үргэлжилж байна.  Дундговь аймгийн Өндөршил сумын малчин, "Алтан ишигний эзэн” Бандгайтын Батсүхэд Монголын радиогийн захирал Ганболдын Батзаяа, Дундговь аймгийн Улаанбаатар хот дахь нутгийн зөвлөлийн тэргүүлэгч, Дундговь аймгийн Засаг дарга асан Сандагийн-Од-Эрдэнэ  нар "Алтан ишигний эзэн”-ий шагналыг хүндэтгэлтэйгээр гардууллаа.  Шагнал гардуулахад Өндөршил сумын Засаг дарга Л.Мөнхбадрах,  тус сумын Ардчилсан намын дарга Д.Оюунчимэг,  албаны бусад хүмүүс, нутгийн малчдын  төлөөлөл байлцлаа. "Алтан төлийн эзэн”-ий шагналын мялаалга болгон энэ нутгийн унаган хүү, "Нюанс” хамтлагийн дуучин Д.Дүйнхэржав  болон сумын соёлын төвийн ардын авьяастнууд ая дуугаа өргөлөө.    Тээгийн уулын баруун суга, Өнгөтийн өвөлжөөнд өнгөтэй тарган өвөлжиж урин хавартай золгож байгаа Б.Батсүх нь БНМАУ-ын аварга малчин Бандгайт агсны хүү бөгөөд эдний ойрын садан, хэдэн жилийн өмнө "Монгол улсын сайн малчин” цол хүртсэн Н.Сумьяагийн эцэг  Намсрай  мөн л "БНМАУ-ын аварга малчин” хүн байжээ. "Алтан төлийн эзэн” гэдэг энэ нэр хүндтэй шагналыг  "Улсын аварга малчин” цолны угтал, "Булган сүүлтэй шагнал”  гэж малчид ихэд бэлгэшээн хүндэтгэдэг  гэдгийг энд хүрэлцэн ирсэн олон хүн онцлон дурьдаж байлаа. "Алтан ишигний эзэн” Б.Батсүх, түүний гэргий Оюунцэцэг нар  ч сэтгүүлчдийн асуултад энэ бол төр, түмний хайр хишиг, нутгийн олны дэм тусын өгөөж догдолсон сэтгэлээ барьж ядан өгүүлсэн юм. 
С.ПҮРЭВСҮРЭН