Н.ЗАГДХОРОЛ: "ДЭЛГЭРИЙН ЧУЛУУ"

Дундговь аймгийн Дэлгэрцогт сумын нутаг Халтарын уул орчмоос иргэд олон жилийн турш үнэт чулуу  түүсээр байгаа бөгөөд сүүлийн жилүүдэд зориулалтын багаж зэвсэг үйлдвэрлэн  уул, овоо онгичин сэндийлж байгаль орчныг сүйтгэсээр байгаа юм Энэ байдалд сэтгэл эмзэглэсэн иргэн Н.Загдхоролын бичсэн шүлгийг хүргэж байна. Энэ шүлгийг зохиогч Н.Загдхорол Монгол улсын Ардын багш Д.төмөрийн хамт татуулсан гэрэл зургийг энд хавсаргасан болно.

ДЭЛГЭРИЙН ЧУЛУУ
Дэлгэрт чулуу гарч, түүж байна гэж
Дэвэн дэлхийгээр нэг шуугив
Эндээс жигүүр дэлгэсэн зарим нь
Эмзэглэж надаас сураг тавив
Сумаа адлаад орхисон хэдээс ч
Сургаар нь ирээд мөлхөж гарав аа
Дэлгэрт чулуу гарч гэнээ
Үгүй ээ тэр чинь гараагүй юм
Хурдан түргэн морьд туурайгаараа тоглож уралддаг
Хэлгий хэлтэй хүүхдүүд нь гэр барьж тоглодог
Хэлхгэр майга өвгөд нь хөл нүцгэн гишгэлдэг
Хээнцэр ганган охид нь алгандаа хөлөргөж ичингүйрдэг
Тэр чинь байсан юмаа
Түүнийгээ л харин түмэн маань түүж эхлэвээ
Халтарын уулын сархиаг болгон зам болгов
Хайран малын минь бэлчээрийг минь гишгэлэн там болгов
Хар хятадын санааны үзүүрт манайхан мөлхөж эхлэв
Хамаатан саднаа дагуулан бөртөлзөж түүвээ
Хацараа уруулсан уул минь хуйсагнаж угтав
Хайрлах сэтгэлгүй та нарын өмнөөс
Хурмаст тань шороо цацаж байна
Чулуугаа түүж амьдрах дээрээ тулсан юм бол бид чинь
Уруудаж яваагийн шинжээ
Сэрцгээ
Халтарын уулаа мөлжиж
Харийнханд өгөх дээрээ тулсан юм бол бид чинь
Хазгай яваагийн шинжээ
Бодоцгоо
Өгөх хүн гэдийдэг атал
Өөрсдөө түүгээд бөхийж байна
Ухаарцгаа
Байдгаа түүгээд өнөөдөр бид бөхийчихвөл
Багачууд минь маргааш юун дээр гэдийх юм бэ
Тунгаацгаа
Үдэш хэвтээд унтах хоорондоо бод
Үүрээр сэрээд босохын хоорондоо боддоо...
Н.Загдхорол