Засгийн газрын сайд нар хууль зөрчиж, 132 хүнийг албан тушаалд томилжээ

 

Төрийн албаны зөвлөлд өнгөрсөн гурван жилийн хугацаанд төрийн албан хаагчдаас 1770 орчим гомдол, маргаан ирүүлжээ. Энэ талаар УИХ-ын дарга М.Энхболд Төрийн ордонд болж байгаа Төрийн албаны удирдах ажилтны зөвлөгөөнийг нээж хэлсэн үгэндээ тодотгосон юм.

Тэрбээр "Төрийн албан хаагчдаас Төрийн албаны зөвлөлд 2015 онд 626, 2016 онд 630, 2017 онд 514 гомдол маргаан ирүүлсэн. Энэ нь ажлын өдөр бүр хоёр гомдол ирж байна гэсэн үг. Энэ нь төрийн удирдах албан тушаалтнуудын үйл ажиллагаа, гаргаж буй шийдвэрт ихээхэн хуудуу байгааг харуулж байгаа хэрэг.

Хууль журам, хууль ёсны эрх бүхий байгууллагыг үл тоомсорлох байдал газар авчээ. Өнөөдрийн байдлаар Төрийн албаны зөвлөлийн сонгон шалгаруулалт, дүгнэлтгүйгээр яам, агентлагийн удирдах албан тушаалд 132 хүнийг дур мэдэн томилсон байна" хэмээн онцолжээ.