ОУВС-гийн хөтөлбөр дуусахад хоёр сарын хугацаа үлдлээ

• "Өргөтгөсөн санхүүжилтийн хөтөлбөр”-ийг үнэлэх ажлын хэсгийнхэн Монголд ирэхээ хойшлууллаа

ОУВС-тай Засгийн газар гурван жилийн өмнө "Өргөтгөсөн санхүүжилтийн хөтөлбөр”-ийг эхлүүлсэн. Эдийн засгийн хүндрэлээс гарах гэж энэхүү хөтөлбөрт элссэн бөгөөд олон удаагийн хэлэлцээрийн үр дүнд бид дахин бусдад төсөв, мөнгөний бодлогоо тушаахад хүрсэн юм. Хөтөлбөрийн хүрээнд төсвийн алдагдлыг бууруулах, мөнгөний бодлого төсвийн шинжтэй үйл ажиллагаа явуулахаас татгалзах, банкны салбарын "эрүүл мэнд”-ийг сайжруулах зэрэг үүрэг, даалгавар хүлээсэн. Тэгвэл ирэх тавдугаар сард тус хөтөлбөр хэрэгжиж дуусах юм. Үүнээс өмнө буюу энэ сард ОУВС-гийн ажлын хэсэг манай улсад ажиллаж, дээрх хөтөлбөрийн хэрэгжилтийг үнэлэх байсан. Гэвч шинэ төрлийн вирусийн тархалтаас үүдэн төлөвлөж байсан дээрх ажлын хэсэг манай улсад ирэх нь тодорхойгүй хугацаагаар хойшилжээ. Хөтөлбөртэй холбоотой санхүүжилт энэ он гарснаас хойш хийгдсэнгүй. Оны өмнө "Өргөтгөсөн санхүүжилтийн хөтөлбөр”-ийн хүрээнд Азийн хөгжлийн банк болон Дэлхийн банкнаас тус бүр 100 сая ам.долларын санхүүжилт манай улсад хийсэн юм. Ингэснээр төв банкны гадаад валютын албан нөөц дөрвөн тэрбум ам.долларыг давсан. Дээрх 200 сая ам.доллар хөтөлбөрийн хүрээнд хийгдсэн хамгийн сүүлийн санхүүжилт болж мэдэхээр байна. Хөтөлбөрийн хэрэгжилтийг үнэлж чадахгүй бол дараагийн санхүүжилт яригдах хугацаа мөн л хойшилно гэсэн үг. Ингэснээр хөтөлбөр дуусах сартай золгож магадгүй нь. Азийн хөгжлийн банкны Монгол Улсад шинээр томилогдсон Суурин төлөөлөгч Павит Рамачандран "Хөтөлбөрийн хүрээнд төсвийн алдагдал хумигдсан. Үүнийг цаашид хадгалж чадвал хөтөлбөрийн үр дүн эдийн засагт илүү бодитой өөрчлөлт авчрах болно" хэмээн сэтгүүлчидтэй уулзах үедээ хэлсэн юм. Хөтөлбөр дуусахтай зэрэгцээд эргээд төсвийн алдагдлаа тэлбэл нөхцөл байдал урьдынхаараа үргэлжлэх хор уршиг өндөр хэвээр байгааг Дэлхийн банк мөн сануулсан билээ.