САЛХИТЫН МӨНГӨНИЙ ОРДЫГ ЭЗЭМШИГЧИД ОРОН НУТАГТАЙ ХЭРХЭН ХАРЬЦАЖ БАЙВ?

Одоо хэвлэл мэдээллээр "Салхитын алт, мөнгөний орд" гэж нэрлэгдээд байгаа уурхай Дундговь аймгийн төвөөс 50 гаруйхан км дэх  орд юм. Энэ ордыг эзэмшигч  Жи Пи  Эф компани аймаг орон нутагт огт өгөөжөө өгөөгүй тухай Дундговь аймгийн Засаг дарга О.Бат-Эрдэнэ хэвлэлийхэнд ярилцлага өгсөн.  Энэ бол нэлээд "Хаалттай" уурхай байсан тул олон нийтийн дунд  дээрээ  төр, засгийн томцуулын нэг эзэн нь юм гэнэ лээ гэсэн цуу яриа их байжээ.  Ер нь 2014 онд болон 2017 онд Дундговь аймгийн  удирдлагатай гэрээ байгуулсан байдаг.  Энэ нь өмнөх болон одоогийн удирдлагатай гэрээ байгуулсан гэсэн үг л дээ. Эхний гэрээ нэлээд бүрхэг, ажиллах хүчний  10-аас дээшгүй хувь гадных, бусад нь орон нутгийнх байхаас өөр тодорхой заалт багатай  байсан бол 2017 оны гэрээнд Дундговь аймгийн  Хүүхдийн байгууллагыг тоног төхөөрөмжөөр хангахад  500 сая төгрөг компаниас гаргах, байгаль орчны сурталчилгааны төв байгуулах зэрэг хэд хэдэн заалт оруулсан ч  гэрээ хэрэгжиж эхлэхээс өмнө маргаан гарч  үндсэндээ үйл ажиллагаа зогссон бололтой. Харин Гурвансайхан сумын ИТХ-ын бүх төлөөлөгчийг Хайнаньд аялуулах талаар ярилцсан ч хэрэгжүүлээгүй юм билээ. Ямар ч байсан дээрх гэрээнээс харахад тэр үедээ "Зүүн" гэж нэрлэгдэж байсан энэ ордыг эзэмшиж байсан компаний удирдлага орон нутагтай яриа хэлэлцээ хийж байсан ч хэрхэн ажил хэрэг болсон нь бүрхэг хэвээр хоцорсон юм.