ЗАВХАНД ДАХИН НЭГ "ГУРВАНСАЙХАН" БИЙ БОЛНО

Завханы Алдархаан сумыхан Дундговь аймгийн Гурвансайхны жишгээр сумаа шинэчилэх ажлаа нэгэнт эхэлжээ. Тэд бүх зүйлээ төлөвлөлт зургаа хийж дуусаад мөнгөө босгочихсон  төдийгүй ирэх хавар ажлаа эхлэхээр бэлдэж байна. Энэ ажлын хүрээнд Завхан аймгаас  сонгогдсон УИХ-ын гишүүн Загдхүүгийн Нарантуяа Алдархаан сумын ИТХ-ын төлөөлөгчдийн хамт Гурвансайхан суманд ирж нэг өдөр ажиллав.    Алдархаан сумын төвийн шинэчлэлийн төлөвлөлт, бэлтгэл ажил дээр Зөвлөхөөр ажиллаж байгаа Равжихын Эрдэнэбүрэн энэ үеэр сумын төвийн шинэчлэлийн бодит үр дүнг газар дээр нь танилцууллаа.  Энэ ажлын үр дүнд Завхан аймагт дахин нэг "Гурвансайхан" бий болох юм.   Юү гэсэн үг вэ гэвэл иргэдийнхээ оролцоотойгоор сумын төвөө шинэчилсэн сум Монгол улсад дахин нэгээр нэмэгдэх юм.  УИХ-ын гишүүн З.Нарантуяа болон холын зочдыг ирэхэд сумын төвийн  цэвэр, бохир ус, дулааны  төвлөрсөн шугамд холбогдсон айл өрхүүд  дулаанаа авч таарлаа. Нэгдсэн шугамд  холбогдож байгаа айл өрхүүд их баяртай байгаагаа холын зочдод ч илэрхийлж амжсан байна.

С.ПҮРЭВСҮРЭН