МОНГОЛООР ДАМЖИЖ 72 ЦАГТ ЕВРОПТ ХҮРНЭ

Ази Европыг холбосон транзит тээврийн асуудлыг өөрийн улсад ашигтай байлгах талаархи саналаа Монгол Улсын Ерөнхийлөгч Х.Баттулга БНХАУ-ын Чиндао хотноо болж буй ШХАБ-ын хуралд оролцох үеэрээ хоёр хөршийн ерөнхийлөгч нарт илэрхийлсэн.

Ингэснээр багагүй хугацаанд яригдсан "Алтанбулаг–Улаанбаатар-Замын-Үүд” чиглэлд баригдах 1000 км хурдны авто замын ажил нэг алхам урагшлах нь тодорхой боллоо. "Чингис Лэнд Девелопмент Групп–Шинэ хөгжлийн зам” ХХК нь ОХУ, Хятад улсыг холбосон олон улсын авто замын сүлжээ барих төслийг концессийн нөхцлөөр барих-ашиглах-шилжүүлэх эрхийг аваад багагүй хугацаа өнгөрсөн.

Төслийн баг олон улсын авто зам барих ТЭЗҮ-ийг боловсруулахдаа монгол орны байгаль цаг уур, газар зүйн байрлал онцлогт тохируулан цогц судалгаа хийжээ. Концессийн нөхцлөөр баригдах төслийн хүрээнд Алтанбулаг, Замын-Үүд, Хөшигтийн хөндийд чөлөөт бүсүүд байгуулагдана.

Уг авто замын трасс нь зургаан аймгийн 24 сум, Улаанбаатар хотын хоёр дүүргийн нутаг дэвсгэрээр дайран өнгөрөхөөр төлөвлөгдсөн бөгөөд хурдны авто зам нь хоёр урсгал, зургаан эгнээтэй байх аж. Азиас гарсан транзит тээвэр 72 цагийн дотор Европд хүрэх онцлогтой энэ төсөл нь шинэ боломжуудыг манай улсад өгөх гэнэ.

Хөрш хоёр орны худалдаа, бараа эргэлтийн хэмжээ тогтмол өсөж байгаа энэ цаг үед уг авто замын төсөл хэрэгжиж эхэлснээр манай улс байгалийн баялгаа бус байршлын давуу талаа ашиглан эдийн засгийн үр ашгаа нэмэгдүүлэх боломж бүрдэх юм.

Бодко