Сүм Хөх Бүрдийг сэргээх төслийн гүйцэтгэлийг түр зогсоов

🕔 2016/05/23 18:39

 
Дундговь аймгийн ЗДТГ-ын захиалгаар "Санжат" ХХК-ийн гүйцэтгэж байгаа Адаацаг сумын нутаг дахь Сүм Хөх Бүрдийн экологийг сэргээж, аялал жуулчлалын бүс болгох төслийн гүйцэтгэлийг аймгийн Мэргэжлийн хяналтын газраас түр зогсоосон байна.

Энэ тухайд байгаль орчны улсын байцаагч Р.Цэрэндорж тодруулахдаа, "Төслийн байгаль орчинд нөлөөлөх байдлын үнэлгээг мэргэжлийн байгууллагаар хийлгэх ёстой байсан. Төсөл эхлэх үед БОНХАЖЯ ерөнхий үнэлгээ хийсэн бөгөөд нарийвчилсан үнэлгээг заавал хийлгэх ёстой гэдгийг захиалагч буюу аймгийн ЗДТГ- т хэлсэн боловч энэ үнэлгээг хийлгүйгээр төслийн гүйцэтгэлийг эхлүүлсэн байна. Аль нэгэн төсөл гүйцэтгэхдээ байгальд орчинд нөлөөлөх байдлын үнэлгээ зайлшгүй хийлгэх ёстой байдаг” гэлээ.

Сүм Хөх бүрд нь Дундговь аймгийн нутаг дэвсгэрт байдаг ганц баян бүрд бөгөөд байгалийн үзэсгэлэнт хийгээд эртний түүх дурсгал хадгалагддаг, өвөрмөц төрх бүрдүүлсэн газар юм. Эл төрхийг хадгалж хамгаалах, аялал жуулчлалыг хөгжүүлэх зорилгоор Сүм Хөх Бүрдийн 780 га газрыг 15 жилийн хугацаатайгаар 2015 онд аймгийн ИТХ-ын тэргүүлэгчдийн тогтоолоор аймгийн тусгай хамгаалалтад авсан. Үүнтэй зэрэгцэн дээрх төслийг эхлүүлсэн байна. Экологийг нь сэргээн, аялал жуулчлалын бүс болгох зөв зорилготой боловч бүтээн байгуулалтыг байгаль орчинд нөлөөлөх байдлын нарийвчилсан үнэлгээгүйгээр хийж байгаа нь Сүм Хөх Бүрдийн өвөрмөц тогтоцыг хадгалах бус хэт эвдэх сөрөг талтай гэж үзэн нарийвчилсан үнэлгээ хийлгэх хүртэл үйл ажиллагааг түр зогсоосон байна.

Мөн барилга байгууламжийн гүйцэтгэлд нь Барилгын тухай хууль зөрчсөн хэд хэдэн зөрчил илэрчээ. Түүнчлэн аймгийн тусгай хамгаалалттай бүсэд Адаацаг сумын ЗДТГ 25 га газар эзэмшүүлэх зөвшөөрөл өгсөн нь хууль зөрчсөн асуудал болж байгаа ажээ.

Санал болгох

Сэтгэгдэл бичих

АНХААРУУЛГА: Уншигчдын бичсэн сэтгэгдэлд www.Dundgovi.mn сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг устгах эрхтэй!