Өдрийн 3000 рублийн цалингаар хүний оронд ял эдлэхийг санаархжээ

"Хүний  оронд шоронд орно”. Ийм гарчиг бүхий зар ОХУ-ын зарын томоохон сайтын "Ажлын байр” гэсэн цэсэнд багтжээ. Гэхдээ ингэхдээ тухайн шүүхээс ял сонссон хүнээс өдрийн 3000 рублийн цалинтайгаар хамгийн ихдээ дөрвөн жил оронд нь шоронд ял эдлэх гэнэ.

"Fontanka” гэх сайтад нийтлэгдсэн зурагт зар тавигч  эрийн зураг гарсан байх бөгөөд тэрбээр цамц өмсч, буйдан налан суусан байх ажээ. Улмаар нийтэлсэн зард нь "Таны оронд хамгийн ихдээ дөрвөн жилийн хугацаагаар шоронд ял эдэлнэ” гэж бичсэн байсны зэрэгцээ "Хүчин болон бусад жижиг хэргийн ялыг үүрэхгүй. Мөн зөвхөн ОХУ-ын нутаг дэвсгэрт  ял эдэлнэ” гэх нөхцлийг тавьсан байсан гэнэ.

Түүнчлэн, төлбөрийн тухайд нэг өдөрт 3000 рубль. Шийтгэлээс хамаарч төлбөрийг хямдруулж болох хэдий ч, чанга дэглэмтэй болон бусад гяндан руу шилжүүлэх тохиолдолд нэмэлт төлбөр авна гэх заалтыг оруулсан байжээ.  Вэб сайтын зүгээс зарыг хэсэг хугацаа өнгөрсний дараа устгасан гэнэ.