Доналд Трамп гэж хэн бэ?

Доналд Жон Трамп 1946 оны долдугаар сарын 14-Нью-Йорк хотын Ямайка Стейтс хэмээх дагуул хотод мэндэлжээ. Тэрээр эцэг эхээс тавуулаа, дээрээс хоёр дахь нь. Түүний эцэг нь герман гаралтай, ээж нь шотланд цустай хүн байв. Трамп 13 настайдаа Нью-Йоркийн цэргийн академид суралцахаар  явж хүүхэд ахуйн сахилгагүй зангаа орхиж дэг журамд суралцсан гэдэг. Ирээдүйн эрбумтны хүмүүжилд хамгийн их нөлөө үзүүлсэн хүн бол мэдээж эцэг Фред нь. Тэд зан аашийн хувьд усны дусал шиг ижилхэн байв. 

Бизнесийн ертөнцөд хөл тавихаасаа өмнө залуу Доналд эцгийнхээ үгийг дагаж коллежид суралцахаар болов. Тэрбээр 1964 онд Фордхамийн их сургуульд орж хоёр жилийн дараа Пенсилванийн Санхүү худалдааны их сургуульд шилжин суралцлаа. Трамп ердийн нэг оюутан байсангүй. Архи, тамхи хэрэглэдэггүй байв. Гэвч хичээл сургууль түүний хувьд гол зүйл байсангүй. Эцэгтээ бизнест нь туслахын зэрэгцээ ирээдүйн тэрбумтан үл хөдлөх хөрөнгийн наймааг сонирхож хэзээ нэгэн цагт эцгээсээ илүү том гарын бизнесмэн болно гэж мөрөөдөж байв.

Сурч байх үедээ тэрээр эцэгтэйгээ зөвлөлдсны дагуу Охайо мужид дампуурсан компанийн айлын орон сууцны цогцолборыг худалдаж авлаа. Сонирхолтой нь Трамп гэр бүлийн авсан энэ цогцолборыг сэргээн засварлахад улсаас мөнгө гаргаж байжээ. Ердөө зургаан сая доллараар авсан цогцолборыг тэд 12 саяаар эргүүлэн зарсан аж. Энэ амжилттай наймаа нь ирээдүйн барилгын магнатад тун их урам хайрласан гэдэг. Гэхдээ түүний ажил хэрэг үргэлж анхных шигээ амжилттай байгаагүй аж. Тэрбээр зөн совингоороо Нью-Йорк руу тэмүүлдэг байсан бөгөөд энэ хот түүнд их мөнгө авчирна гэдгийг мэддэг байжээ. 

Трамп 1988 оноос улс төрийг сонирхож, 2008, 2012 оны АНУ-ын Ерөнхийлөгчийн сонгуульд нэр дэвшихээр оролдож байсан билээ. Тэрээр казино, зочид буудал, үл хөдлөх хөрөнгөөс гадна дэлхийн 90 оронд 2,5 тэрбум хүн үздэг "Дэлхийн мисс” тэмцээний албан ёсны эзэмшигч. Доналд Трамп гурван эхнэрийн таван хүүхэдтэй. Түүний гурав дахь эхнэр Словенийн загвар өмсөгч Мелани Кнаусс тэрбумтан нөхөртөө хүү төрүүлж өгсөн юм. 

Эх сурвалж: www.polit.mn