Рио Тинто: "Оюу толгой" бүтээгдэхүүнээ Японд туршилтаар тээвэрлэнэ

 

"Рио Тинто” группээс хэд хоногийн өмнө хөрөнгө оруулагчидтай уулзалт зохион байгуулсан байна. Энэхүү уулзалтын үеэр тус групп Монголын "Оюу толгой” компани бүтээгдэхүүнээ туршилтаар Япон руу тээвэрлэнэ хэмээн мэдээллэжээ. Энэ талаар "Оюу толгой" ХХК-ийн албаны эх сурвалжаас тодрууллаа. Тус группээс "Оюу Толгой” компани БНХАУ-ын 20 гаруй хайлуулах үйлдвэрт бүтээгдэхүүнээ нийлүүлэхээс гадна Японд үргэлжлүүлэн туршилтаар тээвэрлэх болно" гэж мэдээллэсэн байна.

Өнгөрсөн онд "Оюу толгой” компаниас Япон руу бүтээгдэхүүнээ туршилтаар тээвэрлэсэн билээ. Олон улсын хэвлэл мэдээллийн хэрэгслүүдээр, "Mitsubishi Materials Corp” болон "Mitsui & Co” нь туршилтаар 5000 тонн зэсийн баяжмал импортлох гэрээг "Оюутолгой” компанитай байгуулсан тухай "Mitsubishi Materials Corp”-ын Түүхий эд хариуцсан хэлтсийн ерөнхий менежер Тацуя Иноуэ мэдэгдэж байв. Тэрээр "Бид олон нийлүүлэгчтэй болох хүсэлтэй байна” хэмээн ярьсныг "Reuters” онцолсон байдаг.

Өнөөдрийн байдлаар "Rio Tinto” групп "Оюу Толгой” төслийг 2010 онд хэрэгжүүлж эхэлснээс хойш нийт 5.7 тэрбум ам.доллар зарцуулаад байгаа ажээ. Тус группээс мэдээллэснээр, 2020 оноос гүний уурхайн анхны бүтээгдэхүүнийг үйлдвэрлэж эхлэх бол 2027 оноос гол баяжмалын олборлолт явагдаж эхэлнэ гэж тооцоолж буй юм байна. "Рио Тинто" групп "Оюу Толгой”-н гүний уурхайн баяжмалыг худалдан авах хэрэглэгчийн бааз суурь сайн байгаа. Монгол Улсад гадаадын шууд хөрөнгө оруулалтыг дэмжих улс төрийн дэмжлэг сайн байна” хэмээн дүгнэж буйгаа илэрхийлжээ.

Э.ЭНХ-ЭРДЭНЭ

Эх сурвалж: Мэдээ.мн