Аймгийн Засаг дарга С.Од - Эрдэнэ нутгийн зон олондоо Сар шинийн мэндчилгээ дэвшүүллээ

Дуу хуур , ёс заншлын өлгий Дундговь аймгийн ард иргэдээ Төгс буянт, төгөлдөр сайхан азай буурлууд , ахан дүүс , идэр залуус аа. Та бүхэндээ морилон ирж буй XVII жарны "Үр тариа чухаг” хэмээх өнгө бэлгэдэлт гал бичин жилийн хотол баясгалант өлзийт ерөөлийг өргөн дэвшүүлье ээ.

Цагаан сар бол өвөг дээдсийн үеэс уламжлагдан ирсэн дорно дахины төрт ёсны их баяр, Монгол түмний зан заншил, өв соёл, хүндэтгэлийн дээд нь бөгөөд ирж буй шинэ цагийн угтал юм. Хатуу өвөл хангиран одож, хаврын урин халгин ирж буй билгийн тооллын хоёр оны зааг дээр цагаан сарын шинийн нэгэн тохиож Та бид ураг төрөл, элгэн түмэн, хотол олноороо хадаг барин золгож , сэтгэл дэлгэн мэндчилдэг уламжлалтай билээ. Та бүхэн минь бие амархан сүрэг тарган сайхан өвөлжиж , тавлаг сайхан хаваржиж байна уу. Гал бичин жил улс орны маань хувьд түүхэн жил болон тэмдэглэж үлдэх бид бүгдийн сонголтын жил байх болно.
Аз жаргал алган дээр жиргэж, ард түмний маань амьдрал цэцэглэн дэвжиж, төр засаг түвшин байж, түмний заяа буян тэгш дүүрэн байх болтугай,
Төрлөөрөө түвшин амгалан
Элгээрээ энх амгалан
Төр улсаараа элбэг дэлбэг
Төрөл садан олноороо сар шинэдээ сайхан шинэлээрээ
Аймгийн Засаг дарга С.Од-Эрдэнэ.