Эверестэд гацсан 1,000 гаруй хүнийг аврах ажиллагаа үргэлжилж байна

🕔 2025/10/06 13:02

Төвдийн зүүн хэсэгт орших Эверест уулын энгэрт хүчтэй цасан шуурга үүссэний улмаас 1,000 орчим хүн майхан дахь баазууддаа гацсан тухай Хятадын төрийн хэвлэлүүд мэдээллээ.
Орон нутгийн аврах алба болон хэдэн зуун иргэн 4,900 метрийн (16,000 фут) өндөрт орших бүс рүү хүрэх замыг цаснаас цэвэрлэж, хүмүүсийг аюулгүй байдалд хүргэх ажилд оролцож байна. Одоогийн байдлаар 350 орчим хүнийг авран, Күданг хэмээх жижиг тосгонд хүргэжээ.
Цасан шуурга баасан гарагийн орой эхэлж, Төвдийн зүүн хэсэгт улам эрчимжсэн бөгөөд энэ бүс нь уулчид, аялагчдын дунд нэр хүндтэй аяллын чиглэлд тооцогддог.
“Цас, бороо ээлжилж, маш хүйтэн байсан. Хөлдөлт, даарч осгох аюул бодит болсон. Манай хөтчийн хэлснээр ийм цаг агаар аравдугаар сард урьд өмнө тохиож байгаагүй гэсэн" хэмээн аврагдсан нэгэн аялагч ярьжээ.
Төвдийн “Blue Sky Rescue” аврах багийн мэдээлснээр, хүчтэй цаснаас болж олон майхан нурж, зарим аялагч даарч осгосон байжээ. Хариу арга хэмжээний хүрээнд Тингри тойргийн Аялал жуулчлалын компани бямба гарагаас эхлэн Эверестийн аялал жуулчлалын бүс рүү нэвтрэх, тасалбар худалдахыг түр зогсоосон байна.
Бүс нутаг даяар цаг агаарын ноцтой үзэгдэл үргэлжилж байгаа бөгөөд хөрш Непалд хүчтэй аадар борооноос үүдэн хөрсний гулгалт, үер гарч, гүүрнүүд нурж, сүүлийн хоёр хоногт дор хаяж 47 хүн амь үрэгдсэн байна.
Харин Хятадын өмнөд хэсэгт “Матмо” нэртэй хар салхи дэгдэж, 150,000 гаруй хүнийг нүүлгэн шилжүүлэхэд хүржээ.
Дэлхийн хамгийн өндөр оргил болох 8,849 метрийн өндөртэй Эверест уул руу жил бүр олон хүн авирахыг оролддог ч энэ нь хамгийн аюултай аяллуудын нэг хэвээр байна. Сүүлийн жилүүдэд уг ууланд авирагчдын тоо хэт олширч, байгаль орчны доройтол болон үхэлд хүргэсэн ослууд нэмэгдэх болсон талаар мэргэжилтнүүд анхааруулж байна.

Санал болгох

Сэтгэгдэл бичих

АНХААРУУЛГА: Уншигчдын бичсэн сэтгэгдэлд www.Dundgovi.mn сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг устгах эрхтэй!
Dundgovi Mn