Өвөлжилтийн бэлтгэл хангуулах ажлын хэсэг хуралдлаа

 

Аймгийн Засаг даргын 2016 оны 08 дугаар сарын 19-ний өдрийн А/310 тоот захирамжаар "2016-2017 оны Мал өвөлжилтийн болон төв суурин газрын өвөлжилтийн бэлтгэл ажлыг хангуулах” ажлын хэсгийг аймгийн Засаг даргын орлогч Ж.Мөнхчулуунаар ахлуулан байгуулсан.

Ажлын хэсэг хөдөө аж ахуй, төв суурин гэсэн үндсэн 2 хэсэг, 58 заалт бүхий төлөвлөгөөг боловсруулан хэрэгжилтийг ханган ажиллаж байна. ажлын хэсгийн мэдээллээр 9-р сарын байдлаар хөдөө аж ахуйн өвөлжилтийн бэлтгэл 71,35 хувьтай явагдаж байна.

Цаашид Хөрш зэргэлдээ аймгууд болон өөрийн аймаг, сумдын хооронд отор нүүдлийн зохион байгуулалт хийх, түүнчлэн малын халдварт өвчнөөс урьдчилан сэргийлэх зэрэгт анхаарал хандуулж аймгийн ИТХ-ын дарга С.Сүхбаатар, аймгийн Засаг дарга О.Бат-Эрдэнэ, Засаг даргын орлогч Ж.Мөнхчулуун нар сумдад ажиллаж өвөлжилтийн бэлтгэл ажилтай танилцаж, иргэд хөдөлмөрчидтэй уулзалт хийхээр төлөвлөлөө.

Мөн малчдыг гар тэжээл, халтар хомоол, дарш, хужир, шүү бэлтгэх чиглэл өглөө. 

Төв, суурин газрын өвөлжилтийн бэлтгэл 70 хувьтай төлөвлөгөөний дагуу явагдаж байна.

Дулаан болон цахилгаан эрчим хүчээр хангагч байгууллагууд иргэдийн санал хүсэлтийг хүлээн авах утсыг ажиллуулж эхэлжээ. "Дундговь-Ус” ОНӨҮГазар 70593684, "Дундговь ЦТССүлжээ” ТӨҮГазар 70592500, "Ган-Илч” ХХК 80400002, "Тэвшийн говь” ХХК 88722456 утсаар байнгын дуудлага хүлээн авч ажиллаж байна. Дулаанаар хангагч байгууллагууд 10 сарын 1-ний өдрөөс эхлэн халаалт өгөхөөр бэлтгэл ханган ажиллаж байна.

Эх сурвалж: http://dundgovi.gov.mn/mn/index.php?pid=77&nid=7435