“60 тэрбумын эзэн” Ц.Сандуй хэргээс мултрахын тулд намын удирдлагуудаа гүтгэж эхлэв

Энэ сарын 26 буюу ирэх Пүрэв гаригт 60 тэрбумын хэргийн шүүх хурал болно. Үүнээс өмнө Ц.Сандуй ил гарч, хэргийн талаар сөхөн хөндөж, бас намынхнаа хөлдөө чирэхээр шийдсэн бололтой. Өчигдөр өгсөн ярилцлагадаа Ц.Сандуй иргэн Доржзодовын санал болгосон схемийг мэдэж байсан гэдгээ хэлээд, сонгуульд ялахын тулд мөнгө босгох санаачлагуудаа тодорхой тоочсон ярианы бичлэгээ "согтуу хүний үг” хэмээн тайлбарлалаа.

Гэсэн хэдий ч өөр нэг асуултад тэр ярианы бичлэгийг эвлүүлэг хэмээн дахин мэлзэв. Мөн 60 тэрбумын схемийн асуудалд М.Энхболд дарга ямар ч хамаагүй мэтээр ярив. Ярилцлагын турш Ц.Сандуй бичлэгийг нэг бол эвлүүлэг болгон хувиргаж, эс бол 60 тэрбумын асуудал МАН-ын удирдлага У.Хүрэлсүх, Л.Амарбаясгалан, Л.Оюун-Эрдэнэ нарын улстөрчид холбоотой мэт ойлголт өгөхийг хичээв.

Үнэн хэрэгтээ МАН-ын дарга асан М.Энхболд 60 тэрбумын яриа, санаачлага намын удирдлагын цөөн хүний хүрээнд гарч байсан гэдгийг хүлээн зөвшөөрөөд, МАН-ын Хяналтын хороонд "Намынхаа нэр хүндийг уг асуудалд холбогдуулсандаа туйлын их харамсаж байна” гэсэн санаагаа албан бичгээр илгээн, уучлал гуйсан байдаг.

Ц.Сандуйгийн тухайд ч өмнө нь намын УЗ-ийн хурал дээрээ бичлэг бодитой гэдгийг хүлээн зөвшөөрч, олон нийтэд эвлүүлэг хэмээн ойлгуулсандаа харамсал илэрхийлсэн тухай яриа явдаг. Гэвч Ц.Сандуй шүүх хурлын өмнө энэ бүгдээс бултаж, алдарт 60 тэрбумын хэргээ бусдад наахыг санаархаж, намын удирдлагуудаа гүтгэж эхэллээ.

Ц.Сандуй яагаад шүүх хурлын өмнө Ерөнхийлөгчийн телевизэд очиж, Цензургүй ярьсан бэ. Энэ асуулт энэ долоо хоногт олон нийтийн дунд, нийгмийн сүлжээнд хамгийн их яригдаж байна. Эрүүгийн 17 0200016 тоот хавтаст хэргийн эзнийг хэн Ерөнхийлөгчийн телевизийн босгоор давуулсан байх вэ?

Улс төрийн шинэ нөхцөлд дасан зохицохгүй байгаа МАНАН бүлэглэл чимээгүй бөгөөд амь бөхтэй оршиж байгаа. Бүлэглэлийн зүгээс Ц.Сандуйг шүүх хурлын өмнө ярилцлага өгүүлж, МАН-ын дотор яс хаяснаар, өөрсдийн төлөөлөл болох улсын яллагч, шүүгчдэд нөлөөлж, 60 тэрбумын эздийг аврах төлөвлөгөө боловсруулсан байж болох уу.  Хэрвээ энэ таамаглал үнэн бол тэдний эцсийн зогсоол, эцсийн арга нь Ерөнхийлөгчийн телевиз байсан нь юуг хэлнэ вэ?

Эх сурвалж: updown.mn