ЭРДЭНЭТИЙН УНАГАН ХӨВГҮҮН УКРАЙНЫ ЕРӨНХИЙЛӨГЧ БОЛОХ НЬ УУ ДАА

Украйны Ерөнхийлөгчийн сонгуулийн эхний шатанд 30,4 хувийн саналаар хол тасарч яваа Владимир Зеленский хоёр шатанд ялах магадлал өндөр байна. Украины шоумен, комеди жүжигчин, найруулагч, продюссер Владимир Александрович Зеленский гэж хэн бэ, Тэр 1978 оны нэгдүгээр сарын 25-нд төрсөн. Түүний эцэг болох математикч, программист, техникийн ухааны доктор, профессор Александр Семёнович Зеленский Монголд 20 жил ажиллаж амьдран, уулын баяжуулах Эрдэнэт үйлдвэрийг босголцож байжээ. Зеленский бага насандаа 4 жил Эрдэнэт хотод амьдарч байгаад нэгдүгээр ангиа төгссөн байна. Дараа нь Украин руу буцан, англи хэлний гүнзгийрүүлсэн сургалттай гимназ төгсчээ. 1995 онд дунд сургуулиа төгссөн тэрбээр Киевийн үндэсний эдийн засгийн их сургуулийн Криворожийн эдийн засгийн дээд сургуульд элсэн орж, хуулийн боловсрол олж авсан ч мэргэжлээрээ хэзээ ч ажиллаж байгаагүй гэнэ. 2003 онд Елена Владимировна гэх бүсгүйтэй гэрлэсэн, тэд охин, хүү хоёртой. Хөрөнгийн тухайд, 2017 онд жилийн орлого нь 7.3 сая гривен (664 сая гаруй төгрөг), түүний банкны дансанд 434 мянган ам.доллар, 1.2 сая гривен байгаа гэж мэдүүлжээ.
Тэрбээр Киев мужийн Иванкович сууринд 29 мянган ам.доллараар худалдаж авсан байшин, 25 мянган ам долларын үнэтэй 1200 квадрат метр эдлэн газартай. Түүнээс гадна Зеленскийгийн гэр бүл 5 байртай бөгөөд тэдгээрийн 4 нь Киевт байдаг гэнэ. Мөн Их Британид хоёр байр түрээслэдэг аж. 

 Харин түүнийг Монголд байсан тухайгаа ярихыг эцэг нь хориглодог байсан тухай мэдээлэл бий.