Луус сумын сургууль сурагчдын суралцах таатай орчныг бүрдүүлжээ

Дундговь аймгийн Луус сумын ерөнхий боловсролын есөн жилийн дунд сургууль 2018 онд 90 гаруй сая төгрөгийн хөрөнгө оруулалтаар сургуулийнхаа дотоод, гадаад орчныг сайжруулж, багш, сурагчдынхаа суралцах, ажиллах таатай орчныг бүрдүүллээ.

Мөн "Дэлхийн зөн" олон улсын байгууллага, "Мобиком" болон Орон нутгийн хөгжлийн сангийн нийт 80,0 сая төгрөгийн хөрөнгө оруулалтаар цэвэр, бохир усны системд холбогдож, ариун цэврийн иж бүрэн байгууламжийг бий болгосон байна.

харин БНСУ-ын "Кемён” соёлын их сургуулийн багш, оюутнууд хүмүүнлэгийн тусламжийнхаа хүрээнд 5000$буюу 12,0 сая төгрөгийн хөрөнгө оруулалтаар сургуулийн гадна, дотно урсгал засварыг хийж өгчээ.

Сургуулийн захиргаанаас багш, ажилчид, эцэг эхчүүдийн хандив, дэмжлэгтэйгээр "Багш хөгжлийн төв"-ийг тохижуулж, тэдний ажиллах, хөгжих таатай орчныг бүрдүүлсэн аж.

Луус сумын дунд сургуулийн багш нарын 76,2 хувь нь мэргэжлийн зэрэгтэй, 71,3 хувь нь улс, аймаг, бүсийн хэмжээнд бүтээлээ түгээн дэлгэрүүлж, бүртээлийн гэрчилгээ авсан ба тус сургууль сүүлийн хоёр жилд аймагтаа "Зорилтын хэрэгжилтийг манлайлагч” сургуулиар шалгарсан амжилтыг үзүүлсэн ажээ.2018-2019 оны хичээлийн жилд тус сургууль 18 багш, 160 хүүхэдтэй үйл ажиллагаагаа явуулж буй.