Цагдаа, ШШҮХ-ийн шинжээчид 3,3 тэрбум төгрөгийн авилга бүхий лицензийн хэрэгт холбогджээ

 

Хэдхэн хоногийн өмнө бид цагдаа болон ШШҮХ-ийн шинжээчид  гэмт хэрэгт холбогдон эхнээсээ цагдан хоригдоод байгаа талаар өмнө нь мэдээлсэн. Тэгвэл хууль сахиулагчдын холбогдсон хэрэг ил болсон талаар эх сурвалжууд мэдээлж байна. 

Дундговь аймгийн Гурвансайхан сумын нутаг дахь, 400 гаруй сая ам.доллараар үнэлэгдэх нөөцтэй гэж урьдчилсан байдлаар тогтоосон алт, мөнгөний ордын тусгай зөвшөөрөл буюу лицензийг эзэмшигч БНХАУ-ын иргэн хөрөнгө оруулагч БНХАУ-ын иргэнтэйгээ үл ойлголцсон байна. Улмаар нэгнийгээ залилсан хэмээн цагдаагийн байгууллагад өргөдөл өгч, "заргалдагч” тал нь  хуурамч гарын үсэг зурсан хэмээн хариу гомдол мэдүүлснээр энэ хэрэг АТГ болон цагдаагийн анхааралд өртсөн байна.

Тиймээс АТГ, цагдаагийн байгууллагаас хамтарсан ажлын хэсэг байгуулан Дундговь аймгийн Гурвансайхан сумын нутаг дахь тусгай зөвшөөрлийг булаацалдсан хятадуудын маргаантай хэрэгт шинжээчээр оролцсон шинжээч эмч, хэргийг шалгаж байсан цагдаа нар "но”-той байх магадлалтай гэж үзсэн. Тиймээс Хан-Уул дүүргийн Цагдаагийн I хэлтсийн Мөрдөн байцаах тасгийн дарга, хошууч Г.А, Шүүхийн шинжилгээний үндэсний хүрээлэн (ШШҮХ)-гийн Криминалистикийн шинжилгээний газрын дарга, дэд хурандаа Д.А, шинжээч Ж.Т нарыг саатуулаад байна.

Харин энэ хэрэгт холбоотой ШШҮХ-ийн ахлах шинжээч Э.С, С.С нарыг гадуур байцааж, ГИХГ-ын дэд даргаар хэсэг хугацаанд ажилласан, цагдаагийн офицер асан, манай улсын иргэн М, Ж болон БНХАУ-ын хөрөнгө оруулалттай компанийн эрх бүхий албан тушаалтнуудыг  мөн шалгаж байгаа юм. 

Өөрөөр хэлбэл БНХАУ-ын иргэд хууль сахиулагчдад мөнгө өгч өөрсдөдөө ашигтай шийдвэр гаргуулахаар оролдлого хийхээр төлөвлөөд байсан гэх бөгөөд тэдний хахуульд өгөхөөр төлөвлөөд байсан 1.3 сая ам.доллар буюу 3.3 тэрбум төгрөгийг түрээслэж байсан байрнаас нь хураан авчээ.

Хураагдсан 1,3 сая ам.долларын талаар АТГ-ын Мөрдөн шалгах хэлтсийн дарга, эрхэлсэн комиссар Э.Идэрцог: "ШШҮХ-гийн шинжээчид худал дүгнэлт санаатай гаргасан хэрэгт холбогдож цагдаагийн байгууллагад шалгуулж байсан. Үүнд авлига, хээл хахуулийн шинжтэй зүйл тогтоогдсон учраас цагдаа, АТГ-ын хамтарсан ажлын хэсэг байгуулан шалгаж эхэлсэн” гэдгийг хэлсэн. 

Ямартай ч  хураагдсан гэх 1.3 сая ам.доллар буюу 3,3 тэрбум төгрөг нь хууль сахиулагчдын мөнгө биш болохыг эх сурвалж баталлаа. Одоо харин энэ хэрэг хэрхэн шийдэгдэхийг харах л үлдлээ.