М.Оюунчимэг: Ундраа гишүүн ээ, битгий жүжиглээд бай

Нийгмийн сүлжээнд оногдсон хувийн орон зайдаа иргэн хүн өөрийн хүссэнээ бичихийг хэн ч хориглох боломжгүй юм. Гэвч улсын нэр нүүр, хууль тогтоох дээд байгууллагын төлөөлөл болсон төрийн түшээд нийгмийн сүлжээ ашиглан би, чи-дээ тулах нь ёс зүйгүй бөгөөд сонгогчдоо илтэд доромжилсон, эрээ цээргүй, хэтэрхий бүдүүлэг үйлдэл юм.

Өнгөрсөн лхагва гаригийн орой УИХ-ын гишүүн А.Ундраа, М.Оюунчимэг нар твиттер хуудсаараа "тулалдав”. УИХ-ын гишүүн М.Зоригт өөрийн твиттер хуудастаа "Бандаашны асуудал дээр УИХ-ын хүүхнүүд тодрох гэж оролдоод байх шиг. Бид сохор биш. Та нар 00 байсан шүү!!!" хэмээн өөрийн үзэл бодлоо илэрхийлж жиргэжээ.

Тус жиргээнд УИХ-ын гишүүн А.Ундраа илтэд дургүйцэж буйгаа илэрхийлэн "Мөнхчулууны Зоригт та энд УИХ-ын эмэгтэй гишүүдийг доромжилж, ёс зүйгүй юм ярьж суухын оронд Ардчилсан намынхаа мундаг, чадварлаг бүсгүйчүүдээ уриалж, тэмцэж, Мурат гишүүний өргөдлийг нь өгүүлэх хэрэгтэй. Zero Tolerance for sexual harassment and #EndViolenceAgainstWomen" гэж хариу жиргэсэн байна.

М.Зоригт дахин "Гишүүн хүүхнүүд сээтэгнээд л...” гэтэл А.Ундраа гишүүн "Энэ тоглоом уу? Сээтэгнэх ээ? Ам нээснийх уушги нээе! Охид бүсгүйчүүдийн зургийг олноор оруулж элдэв юм бичдэг зуршил чинь орчин үед нэг хэлбэрийн бэлгийн хүчирхийлэл гэж тооцогддог. Ялангуяа насанд хүрээгүй эсвэл өөрөөс нь зөвшөөрөл аваагүй бол. Шар сэмжилсэн гэж хэлдэг байх аа!” гэж дургүйцлээ илэрхийлжээ.

УИХ-ын гишүүн М.Оюунчимэг энэ муудалцааныг хараад тэвчсэнгүй юү "Ундраа гишүүн ээ, наад шоугаа боль. Ам нээснийх уушги нээе гэж та хэллээ. Та охид бүсгүйчүүдийн хүчирхийллийн аймшигт тохиолдлууд дээр огт дуугарч байгаагүй. Дүнжингаравын шөнийн морины уралдаанд хохирсон хүүхэд дээр чи дуугараагүй. Битгий жүжиглээд бай. Ард түмнээ хайрла” хэмээн жиргэсэн байна.