ОУВС, “РИО ТИНТО” ГЭДЭГ “ХАДНЫ МАНГАА”

 

 

ОУВС-гийн Монгол дахь суурин төлөөлөгч Нэйл Сакер "2017 оны төсвийн тодотголыг хэрэгжүүлэхтэй холбогдуулан баталсан УИХ-ын тогтоолоос тодруулах зүйл үүссэн тул энэ удаагийн хурлаар хэлэлцээгүй. Түр хугацаагаар хойшлуулсан. Тус заалт Монгол Улсын макро эдийн засагт хэрхэн нөлөөлөхийг судлах чиглэлийг Олон улсын валютын сангийн Захирлуудын зөвлөлөөс өгсөн” хэмээн мэдэгдсэн. Дээрх тогтоолын холбогдох заалт хөрөнгө оруулагчдын эрх ашигт халтай эсэх, Хөрөнгө оруулалтын тухай хуулийг зөрчсөн эсэхийг судалж үзсний дараа Монгол Улсын Засгийн газрын хүсэлтийг хүлээн авч хэлэлцэх аж. Монголын баялгийг хором алдалгүй олборлож буй "Рио Тинто” төслийнхөө төлбөр тооцооны тодорхой хэсгийг Монголын банкуудаар явуулах тухай заасан УИХ-ын тогтоол эгдүүг нь хүргэсэн хэрэг.

 

Угтаа бол эрх баригчид Олон улсын валютын сангийн тавьсан шаардлагад нийцүүлэн 2017 оны төсөвт тодотгол хийсэн. Төсвийн сахилга батыг сайжруулж, татварын бааз суурийг өргөтгөх хүрээнд хэд хэдэн чухал арга хэмжээ авч хэрэгжүүлэхээр болсон юм. Өөрөөр хэлбэл, Монгол Улсын Засгийн газрын Олон улсын валютын сантай хийсэн хэлэлцээр төлөвлөгөөний дагуу явж байсан. Энэ нь сэхээний тасагт шилжээд байсан Монгол Улсын эдийн засагт шинэ бас сайн мэдээг дагуулж байсан гэдгийг эдийн засагчид онцолж буй. Өөрөөр хэлбэл, эдийн засгийг сэргээх, хөрөнгө оруулагчдыг татах, валютын урсгалыг нэмэгдүүлэх гээд ирээдүйд болох сайн сайхан мэдээ Монголын "хаалга”-ыг тогшиж байсан юм. Эл нөхцөл байдлыг нөгөө л муу нэртэй, луу данстай "Рио Тинто” салхинд хийсгэчихлээ. Үндэстэн дамнасан корпорацийн үндэстэнг намнах нэг хэлбэр энэ. Үүнийг хөхиүлэн дэмждэг байгууллага нь Олон улсын валютын сан. Ийм хоёр "хадны мангаа” Монгол Улсыг залгих гэж улайран зүтгэж байна. Даан ч тэдний сачий нь үл хүрнэ.