Монголд байгаа хамгийн үнэтэй Төвөд нохойг танилцууллаа

 

Сүүлийн үед хүмүүс маш ихээр нохой сонирхох, тэжээх болж, мөнгө ч харамгүй зарцуулж байна. Манай улсад байдаг хамгийн үнэтэй Төвөд мастиф үүлдрийн нохойг 60 орчим сая төгрөгөөр имтпортлон оруулж ирсэн нь үүнийг баталж байна.

 

Өчигдөр Баянзүрхийн гүүрний урд болсон нохой сонирхогчдын цугларалтын үеэр Монголд байгаа хамгийн үнэтэй Төвөд нохдыг танилцуулсан юм. Тэдгээрийг "Отгон Од” гэх клубынхэн 30-60 орчим сая төгрөгөөр БНХАУ-аас оруулж иржээ. 

Мөн Монголд байгаа ноход биеийн бүтэц болоод удам сайтай, үүлдрийн онцлогоо бүрэн хадгалсан байдгаас гадаадын нохой сонирхогчид ч Монголд ирж нохойгоо нийллэгт оруулдаг талаар "Отгон Од” клубын хамт олон ярисан юм. 

Дэлхийн хамгийн өндөр үнэтэй нохой ч энэ үүлдрийнх байдаг ба 1.9 сая доллар хүрч байжээ. 

Монголын хүнд жингийн нохой сонирхогчдын клубээс санаачлан зохион байгуулсан тус цугларалтанд 200 орчим нохой сонирхогч гэр бүл болон өөрсдийн үнэнч анд болсон 100 гаруй нохдын хамт нэгдсэн байлаа. 

Ирсэн хүмүүсийн ярьж буйгаар энэ үйл ажиллагаа нь агаар салхинд гарахаас гадна нохойгоо нийгэмшүүлэх, сонирхол нэгтэй олон найзтай болох, олон жилийн туршлагатай хүмүүсээс мэдэхгүй зүйлээ сурах гээд олон талын ач холбогдолтой байдаг байна.