ДУНДГОВЬ: Ханиад томуугийн өвчлөл их байна

 

 

12 сарын 12-18-ны өдөр байдлаар аймгийн хэмжээнд томуу, томуу төст өвчин амбулаторийн нийт үзлэгт 6%, дуудлагын нийт үзлэгт 10%-ийг тус тус эзлэж байна. Томуу, томуу төст өвчний гаралт аймгийн хэмжээнд аажим ихсэж байгаа бөгөөд аймгийн төвд 12 сарын 22-ны өдрийн байдлаар Нэгдсэн эмнэлгийн амбулаторийн үзлэгт 21,3%, дуудлагын үзлэгт 33,3%, 2 өрхийн эрүүл мэндийн төвийн амбулаторийн үзлэгт 2,1% байна. 

Харин хөдөөгийн 14 суманд эпидемиологийн 50 дугаар долоо хоногийн байдлаар амбулаторийн үзлэгт 7,3%, дуудлагын үзлэгт 12,8 % байна. 

Эрүүл мэндийн газраас томуу, томуу төст өвчний гаралт ихсэж байгаатай холбогдуулан эмнэлэг, эрүүл мэндийн төвүүдэд орны зохицууулалт хийж ажиллах чиглэл өгсний дагуу аймгийн Нэгдсэн эмнэлэг хүүхдийн тасагт нэмэлтээр 20 ор, халдвартын тасагт 10, мэдрэлийн тасагт 10 нийт 40 орыг, 15 сумын эрүүл мэндийн төв 2-5 орыг тус тус нэмэлтээр дэлгэж ажиллуулахаар нөөцөд гаргаад байна. Нэгдсэн эмнэлгийн хүүхдийн тасгийн ачаалалд хяналт хийж ажиллахад нийт 52 хүүхэд хүлээн авсны 42 хүүхдийг хүүхдийн тасагтаа, үлдсэн 10 хүүхдийг Халдвартын тасагт дэлгэсэн нэмэлт орондоо авсан байна. 

Эрүүл мэндийн газраас томуу, томуу төст өвчний гаралт нэмэгдэж байгаатай холбогдуулан нөөцөөсөө аймгийн төвийн Нэгдсэн эмнэлэг, Сайнцагаан, 2 өрхийн эрүүл мэндийн төвүүд болон 5 сургууль, 7 цэцэрлэгт хамгаалах хэрэгсэл, халдваргүйтгэлийн бодисыг хуваарилан олголоо. 

Халдварт өвчин судлалын үндэсний төвд томуугийн эсрэг вакцины захиалгыг өгсөн байгаа бөгөөд нөөцөөс сайн дурын 30 хүн тун вакциныг татан авч эхний ээлжийн хүмүүст хийгээд байна. 

Халдварт өвчин судлалын үндэсний төвөөс мэдээлж байгаа мэдээллээр аймгуудад захиалгын дагуу олгогдох томуугийн эсрэг вакцин Монгол улсад 2016 оны 12 дугаар сарын 24-ний өдөр буух бөгөөд эмч, эмнэлгийн ажилтнууд, хүчний байгууллагуудын ажилчдад тархвар судлалын заалтаар хийгдэнэ гэдэг мэдээллийг өгөөд байна.Томуугийн харуулдан тандалтын журмын дагуу Нэгдсэн эмнэлэг, 2 өрхийн эрүүл мэндийн төвөөс өдөр бүр, 15 сумын эрүүл мэндийн төвөөс 7 хоног тутамд томуу, томуу төст өчний мэдээг авч, дүгнэлт хийн, хяналт тавьж ажиллаж байна.