ХОББИЧИД ЦУГЛУУЛГАА ДЭЛГЭН ҮЗҮҮЛЛЭЭ

Дундговь аймгийн музейд өнөөдөр нэгэн сонирхолтой үзэсгэлэн нээгдлээ. Энэ үзэсгэлэнд хоббичид цуглуулгаа дэлгэн үзүүлснээрээ сонирхол татаж байна.  Аймгийн Эрүүл мэндийн газрын  албаны дарга, хүний их эмч Л.Ганбатын цуглуулга "Хонх” сэдэвтэй. Тэнд орон орны төрөл бүрийн хонх хараа булааж байна. Тав, арван мянган төгрөгийнхөөс аваад хэдэн зуун мянгаар үнэлэгдэх ч хонх энд бий. Гуулин, зэс, алтадмал, шил, шаазан, төмөр... зүсэн зүйлийн том, жижиг, гоё ганган... хонхыг эндээс харж болох бол Шүүхийн шинжилгээний албаны дарга Б.Нарантуул эртний сав суулга, ваар, домбо, гүц, цар гээд зэс, гууль, хүрэл, шавар эдлэл цуглуулсныхаа дээжээс энд тавьжээ. Тэгвэл Сайнцагаан сумын гуравдугаар цэцэрлэгийн багш Б.Сүнжидмаа зааны цуглуулгаараа энэ танхимыг чимсэн байх юм. Бас л олон янз, донжийн, том жижиг, элдэв ааш аяг, хөдөлгөөн үзүүлсэн заан байнаа.  "Тэнгэрийн тэмдэг” хүүхдийн театрын захирал, "Авьяаслаг гэр бүл” өргөмжлөлт Алтангэрэлийн Ууганбаяр гэр бүлийнхнийхээ үүх түүхээс аваад  өөр өөрсдийн хобби, цуглуулга, сурлага, урлаг, спортын авьяас чадварыг илтгэн харуулсан үзмэр, сувдан урлал, чимэглэл, бэлэг дурсгалын зориулалттай дарсны цуглуулгаа дэлгэн тавьсан байна.  Мөн Биеийн тамирын багш Х.Эрдэнэсүхийн гэр бүлийнхний спортын уралдаан тэмцээний медаль, өргөмжлөл, цом, гэрэл зургийн цомог ч сонирхол татах үзмэр юм. Дундговь аймгийн Музей жил бүр ийнхүү элдэв зүйл цуглуулах хоббитой хүмүүсийн цуглуулгыг дэлгэн үзүүлдэг бөгөөд тэр бүхэнд шинэ хоббичид  илэрч олон нийтэд анх удаа цуглуулгаа сонирхуулдаг аж.